जुम्ला । जुम्लाको तिला गाउँपालिका -५ ले वडामा
मदिरा बिक्री वितरण र सेवन गर्ने लाई कार्वाही गर्ने निर्णय गरेकाे छ । वडाका जनप्रतिनिधि, राजनीतिक दलका नेता, समाजसेवी, स्थानीयवासीको उपस्थितिमा साे निर्णय गरिएको हाे ।
वडामा मदिरा बिक्री वितरण र सेवन व्यापक भएको भन्ने गुनासो आए पछि यस्ताे निर्णय गर्न बाध्य भएको तिला -५ का वडाध्यक्ष ललित बहादुर शाहीले जानकारी दिए । उनका अनुसार मदिरा बिक्री वितरण र सेवनले समाजमा विकृति हुने सम्भावना रहेकाले वडाले यस्ताे निर्णय गरेकाे बताए ।
वडा भित्र मदिरा बिक्री वितरण गर्ने र सेवन गर्नेलाई कानुन अनुसार जारिवाना तिराउने समेत निर्णय गरिएको वडाध्यक्ष शाहीले बताए । उनले भने, वडाको निर्णय अटेर गरे कानून बमोजिम सजाय हुने चेतावनी दिए ।
वडामा मदिराका कारण विभिन्न खाले घटना तथा घरेलु हिंसा बढेको गुनासो वडा बासिले गरे पछि उक्त निर्णय गरिएको वडाध्यक्ष शाहीको भनाइ छ । गत २०७९ साल असार महिनाको ३१ गते बसेको वडाको बैठकले मदिरा तथा जुवा तास मुक्त विधेयक वडा सभाबाट पारित गरेकाे थियाे ।
वडाध्यक्ष शाहीका अनुसार मदिरा सेवन र विक्रि गर्ने देखी जुवा तास खेलाउनेलाई समेत सचेत लगाउनका लागि अहिले गाउँवस्तीमा सूचना जारी गरिएको बताए ।
वडा समिति तथा सम्पूर्ण सरोकारवाला, राजनीतिज्ञ शिक्षक, बुद्धिजीवी, समाजसेवी,महिला स्वास्थ्य स्वयंसेविका, स्वास्थ्यकर्मी, बाल क्लब, युवा क्लब र आमा समूहको संयुक्त बैठकबाट उक्त निर्णय पारित भएको बताए ।
वडालाई बालमैत्री स्थानीय शासन घोषणाका लागी चाहिने ५१ सूचकहरु पुरा गरी अगामी चैत महिना भित्र बालविवाह मुक्त वडा घोषणा गर्ने गरी वडा कार्यालय लागि परेको छ । २०८२ को असार महिनाभित्र बालमैत्री स्थानीय शासन वडा घोषणा समेत गरिने गरि काम अघि बढेको वडाध्यक्ष शाहीको भनाइ छ ।
पछिल्लो समय जिल्लामा प्रहरी, प्रशासन तथा स्थानीय तहले आ–आफ्ना क्षेत्र तथा वडामा धमाधम मदिरा नियन्त्रण अभियान सञ्चालन गरेका छन् । वडामा मदिरा न्युनिकरण समिति गठन समेत गरिएको तिला गाउँपालिका -५ का वडाध्यक्ष शाहीले जानकारी दिए ।
