भूकम्प : जुम्लामा पाँच जना घाइते, केही घरमा आंशिक क्षति

महेश चाैलागाँई १८ कार्तिक २०८०, शनिबार १४:३२

छिमेकी जिल्ला जाजरकोटमा केन्द्रविन्द्र बनाएर गएराति गएको भूकम्पका कारण जुम्लामा पाँचजना सामान्य घाइते भएका छन्।

स्थानीय प्रशासनको प्रारम्भिक जानकारीअनुसार जाजरकोटको बारेकोट गाउँपालिका–१ रामिडाँडालाई केन्द्रविन्दु बनाएर भूकम्प जाँदा जुम्लाको तातोपानी गाउँपालिका–३ बाहुनवाडा निवासी २६ वर्षीया सृजना गौतमको हातमा र उनका ११ महिनाका छोरा आयुषको आँखामा चोट लागेको गाउँपालिका अध्यक्ष नन्दप्रसाद चौलागाईंले जानकारी दिए।

प्रमुख जिल्ला अधिकारी जयकुमार घिमिरेका अनुसार तातोपानी–३ का १४ वर्षीय निराजन उपाध्याय, तिला–३ दानीवाडाका ११ वर्षीया सपना थापा र तातोपानी–४ का हरि बहादुर खत्रीको घरको पर्खाल खसेपछि भाग्न खोज्दा खुट्टामा सामान्य चोट लागेको छ।

तिला गाउँपालिका–३, ५ र ९ का केही घर तथा विद्यालय चर्केका छन् भने चन्दननाथ नगरपालिका–८ निवासी विष्णु महतको घरको एउटा कोठा भत्किएको र अरू कोठा चर्किएका जिल्ला प्रहरी कार्यालय जुम्लाले जनाएको छ। यहाँका आठवटै स्थानीय तहका गाउँगाउँबाट भूकम्पले घरहरु चर्किएका खबरहरु आएको स्थानीय तहका प्रमुख बताउँछन्।

जिल्लामा भूकम्पबाट मानवीय क्षति भने नभएको जिल्ला प्रहरी कार्यालयका प्रहरी प्रमुख प्रहरी नायब उपरीक्षक प्रल्हाद कार्कीले जानकारी दिए। जिल्लाकोे यकिन तथ्याङ्कका लागि प्रहरी परिचालित गरिएको जिल्ला प्रहरी कार्यालय जुम्लाले जनाएको छ। भूकम्पले जाजरकोट र रुकुम पश्चिममा ठूलो जनधनको क्षति गरेको छ।

 

Next Post

जाजरकोटमा फेरि शक्तिशाली भूकम्पको धक्का

१८ कार्तिक २०८०, शनिबार १४:३२
आज जाजरकोटको बारेकोट गाउँपालिका– १ रामीडाँडा नै केन्द्रविन्दु भएर ५ दशमलव ८ रेक्टर स्केलको परकम्प महसुस भएको हो । शक्तिशाली परकम्पले भेरी नगरपालिकामा धेरै घर भत्किएको छ भने केही व्यक्ति घाइते भएका छन् । शुक्रबारको भूकम्पले १२ जनाको मृत्यु भएको नगरपालिकाको राउतगाउँमा आजको परकम्पले ३ वटा घर भत्किएको छ । […]