जुम्ला चन्दननाथ नगर पालीका मा सामान्य विवादका कारण पूरै गाउँको विद्युत् आपूर्ति काटिएको छ।
सोमबार बिहान नेपाल विद्युत प्राधिकरणका कर्मचारीले सिंह सार्कीको घरमा नयाँ मिटर जडान गर्दा विवाद सुरु भएको हो। मिटर घर भित्र राखिएको विषयमा सार्कीले प्रश्न गर्दा कर्मचारीसँग भनाभन भएको स्थानीय राजन नेपालीले बताए।
“यो सामान्य प्रश्न मात्र थियो, तर कर्मचारी रिसाएपछि झगडा झैं माहोल बन्यो,” उनले भने।
विवादपछि गाउँकै विद्युत् आपूर्ति रोकिएको छ।
“एक व्यक्तिसँगको सामान्य विवादमा पूरै गाउँलाई अन्धकारमा राख्नु अन्यायपूर्ण हो,” अर्का स्थानीय नवराज नेपालीले भने।
यो विषयमा बुझ्न खोज्दा प्राधिकरण वितरण केन्द्र जुम्लाका प्रमुख रामआशिष शाहले सुरुमा फोन उठाएनन्। पछि फोनसमेत अफ गरेर सम्पर्कविहीन बसेका छन्।
