काठमाण्डौ – भारतीय सेनाले लद्दाखको सीमा क्षेत्रमा नियन्त्रण रेखा उल्लङ्घन गरेको चिनियाँ आरोपको भारतले खण्डन गरेको छ ।
हिमाली क्षेत्रमा रहेको यो सीमामा दुई पक्षबीच तनाव उत्पन्न हुँदा चिनियाँ पक्षले हावामा गोली चलाएको भारतले दाबी गरेको छ । प्रतिक्रिया स्वरूप आफ्ना सेनाले चिनियाँ पक्षलाई फिर्ता गराउन खोज्दा चिनियाँ सैनिकले हावामा गोली चलाएको भारतको दाबी छ ।
सोमबार राति चिनियाँ सेनाले भारतीय सैनिकलाई चेतावनी दिँदै गोली हानेपछि आफूले प्रतिकार गरेको बताएको थियो । विश्लेषकका अनुसार सन् १९७५ पछि सीमामा गोली चलेको यो पहिलो पटक हो ।
गएको जुन महिनामा भारतीय र चिनियाँ सेनाबीच गलवान उपत्यकामा भिडन्त हुँदा कम्तीमा २० भारतीय सैनिकको ज्यान गएको थियो । त्यो घटनामा आफूतर्फ कति सैनिक हताहत भए भन्नेबारे चीनले अहिलेसम्म मुख खोलेका छैन ।
