काठमाडौँ — नेपाल कम्युनिस्ट पार्टी (माओवादी) ले नेपाली सेना दिवसको अवसरमा काठमाडौँस्थित सैनिक मञ्चमा अमेरिकी सेनाले परेड प्रदर्शन गरेको विषयप्रति गम्भीर आपत्ति जनाएको छ। पार्टीका अनुसार उक्त घटनाले राष्ट्रिय सार्वभौमिकता र स्वाधीनतामाथि प्रश्न उठाएको छ।
केन्द्रीय समितिको तर्फबाट जारी वक्तव्यमा अमेरिकी हस्तक्षेपबारे बहस चलिरहेको अवस्थामा नेपाली जनता र राजनीतिक दलको जानकारी तथा सहमति बिना विदेशी सेनाको सहभागितामा परेड गरिनु गम्भीर विषय भएको उल्लेख गरिएको छ। पार्टीले यसलाई “रहस्यमय ढंगले गरिएको गतिविधि” भन्दै विरोध जनाएको छ।
वक्तव्यमा यस्तो कार्य गर्न लगाउने तथा समर्थन गर्ने तत्वहरूको कडा भर्त्सना गर्दै सरकारसँग घटनाबारे स्पष्ट धारणा सार्वजनिक गर्न माग गरिएको छ। साथै देशको स्वाधीनता जोखिममा पर्न सक्ने भन्दै नागरिकलाई सचेत र आवश्यक परे प्रतिरोधका लागि तयार रहन विशेष आह्वान गरिएको छ।
महासचिव विप्लव सी द्वारा जारी उक्त वक्तव्य फागुन ३ गते सार्वजनिक गरिएको हो।
