जुम्ला प्रदेश सभा (क) मा स्वतन्त्र उम्मेदवार देवेन्द्रबहादुर शाही विजयी भएका छन्। प्रदेश सभा (क) मा खसेका कुल २४ हजार ९ सय ५८ मत खसेको थियाे। जसमा शाहीले ९ हजार छ सय ५४ मत सहित विजयी भएका हुन्।
उनका निकटतम प्रतिद्वन्दी नेपाली कांग्रेसका ललितजंग शाहीले ७ हजार ७ सय ५५ मत प्राप्त गरेका छन् भने एमालेका धिरेन्द्रराज गिरीले ५ हजार ४ सय ६० मत प्राप्त गरेका छन्। त्यस्तै नेपाल मजदुर किसान पार्टी (नेमकिपा)का राजेश्वर देवकाेटाले ६ सय ९४ मत प्राप्त गरेका छन्।
जनताकाे बीचमा लाेकप्रिय शाहीकाे लामाे राजनीतिक पृष्ठभूमि छ। आमा कला शाही र बुबा नरवीर शाहीबाट २०१९ कार्तिक ९ गते जन्मिएका थिए। प्राविधिक धारबाट एसएलसी गरेका उनले २०४६ सालबाट जनमाेर्चाकाे राजनीति सुरु गरेका थिए।
तर, पारिवारिक पृष्ठभूमि र कांग्रेसका दिवंगत नेता मानव सेजुवालसँगकाे संगतका कारण उनी २०५८ सालमा कांग्रेस प्रवेश गरे। त्यसैले उनी सेजुवाललाई सँधै आफ्नाे आदर्श गुरु मान्छन्। २०५६ सालसम्म उनी सिटीइभिटीकाे प्रशिक्षक जागिर छाेडेर निर्माण व्यवसायमा लागेका थिए।
२०७४ सालकाे प्रतिनिधि सभा निर्वाचनमा नेपाली कांग्रेसबाट उम्मेदवार बनेका उनले नेपाली कांग्रेसकाे इतिहासमा सबैभन्दा बढी १४ हजार २ सय मत प्राप्त गरेका थिए। तत्कालीन समयमा एमाले र माओवादीकाे गठबन्धन हुँदा समेत पार्टीको साख जाेगाउन भनी चुनावी मैदानमा उत्रिएका थिए। लामाे त्याग र संघर्ष गरेका उनलाई यतिबेला पार्टीले अन्याय गरेपछि स्वतन्त्र उम्मेदवार बनेका थिए।
