रौतहट प्रहरीले सुटकेसमा शव फेला प्रकरणमा सुटकेस फाल्न प्रयोग भएको रिक्साका चालकलाई पक्राउ गरेको छ।
माधवनारायण नगरपालिका–६ कि २६ वर्षीया रुबीकुमारी साहको हत्या गरी शव लुकाउन प्रयोग भएको ई–रिक्सा र चालकलाई नियन्त्रणमा लिएको प्रहरीले जानकारी दिएको छ।
पक्राउ पर्नेमा ई–रिक्सा चालक लक्ष्मण महरा छन्। जिल्ला प्रहरी कार्यालय रौतहटका डीएसपी राजु कार्कीका अनुसार पक्राउ परेका महराले सुटकेसभित्र के सामान छ भन्ने आफूलाई थाहा नभएको प्रहरीमा बयान दिएका छन्।
ई–रिक्सामा सुटकेस राखेर गंगापिप्रा गाउँसम्म लैजान भनेको चालक महराले बताए। यस कार्यका लागि चालक महराले पाँच सय भाडा लिएको प्रहरी अनुसन्धानमा खुलेको छ।
मुडलवा गेटनजिक पुगेपछि ई–रिक्साको चक्कामा समस्या आएको थियो। त्यसपछि ई–रिक्सालाई फिर्ता पठाइ सुटकेस सडकमै राखेर भागेको प्रहरीको भनाइ छ। रुबीको हत्याराको व्यापक खोजी भइरहेको रौतहट प्रहरीले जनाएको छ।
गौर नगरपालिका–९ मुडवलवा गेटस्थित सडकमा बेवारिसे सुटकेसभित्र रुबीकुमारीको शव फेला परेको थियो।
