शुभ दीपावली तथा छठ पर्वको अवसर पारेर गुठिचौर गाउँपालिका–५, फोईमा आयोजित प्रथम खुल्ला ब्याडमिन्टन प्रतियोगिताको उपाधि टिम प्रकाश देबकाेटा ले हात पारेको छ। कात्तिक ४ गतेदेखि सुरु भएको प्रतियोगिता आज सम्पन्न भएको हो।
साेमबार बिहान भएको फाइनल खेलमा गुठिचौर–३ का सुन्दर बुढा र अनिल रावलको टिमलाई पराजित गर्दै देपालगाउँका प्रकाश देवकोटा र जगत भण्डारीको जोडी विजयी बनेको हो। सोही टिम उपविजेता घोषित भएको छ।
गुठिचौर गाउँपालिकाको आर्थिक सहयोग तथा फोई कालिका युवा क्लबको आयोजनामा प्रतियोगिता सम्पन्न भएको हो। प्रतियोगितामा १५ टिमको सहभागिता रहेको क्लबका अध्यक्ष कर्ण प्रसादले जानकारी दिए।
वडा अध्यक्ष ईन्द्र बुढाका अनुसार, युवाको खेलप्रतिको चासोलाई प्रोत्साहन गर्ने उद्देश्यले आयोजना गरिएको प्रतियोगितामा उत्साहजनक सहभागीता देखिएको थियो। “खेल जित–हारका लागि मात्र होइन, आपसी सम्बन्ध सुदृढ बनाउने माध्यम पनि हो,” उनले भने। उनका अनुसार ब्याडमिन्टन कवर्ड हल निर्माणपछि आयोजन गरिएको यो पहिलो प्रतियोगिता हो।
आयोजकका अनुसार विजेता टिमलाई करकट्टी गरी ११,२५०, प्रमाणपत्र, मेडल र ट्रफी प्रदान गरिएको छ भने उपविजेता टिमले करकट्टी गरी ५,२५०, प्रमाणपत्र र मेडल प्राप्त गरेको छ।
