अर्घाखाँची: राष्ट्रिय स्वतन्त्र पार्टीका सभापति रवि लामिछाने ले भागेको हेलिकोप्टर पुनः सिंहदरबार र बालुवाटारमा अवतरण भए लोकतन्त्र खतरामा पर्ने बताएका छन्। अर्घाखाँचीको सन्धिखर्कस्थित शान्ति बगैँचामा आयोजित सभालाई सम्बोधन गर्दै उनले नयाँ शक्तिबाट देशलाई कुनै खतरा नभएको स्पष्ट पारे।
जेनजी आन्दोलनका बेला तत्कालीन प्रधानमन्त्री केपी शर्मा ओली सेनाको हेलिकोप्टरबाट बालुवाटार छाडेको प्रसंग स्मरण गर्दै लामिछानेले उक्त टिप्पणी गरेका हुन्। “जसबाट लोकतन्त्रको खतरा थियो, ऊ हेलिकोप्टर चढेर भागिसक्यो। फेरि त्यो हेलिकोप्टर सिंहदरबार र बालुवाटारमा ल्यान्ड भयो भने लोकतन्त्र खतरामा पर्छ,” उनले भने।
उनले जनताले संघर्ष गरेर ल्याएको लोकतन्त्रको रक्षा नेताले नभई जनताले नै गर्ने जिकिर गर्दै रास्वपा त्यसको संरक्षणका लागि प्रतिबद्ध रहेको बताए। सहिदहरूको बलिदान खेर नजाने गरी काम गर्ने प्रतिबद्धता पनि उनले व्यक्त गरे।
लामिछानेले आफ्नो पार्टीले सबैभन्दा बढी महिला, युवा, डाक्टर, इन्जिनियर, सामाजिक अभियन्ता, कवि तथा कलाकारलाई उम्मेदवार बनाएको उल्लेख गर्दै मतदातालाई ढुक्कका साथ रास्वपालाई मत दिन आग्रह गरे। साथै अर्घाखाँचीबाट रास्वपाका उम्मेदवार हरिप्रसाद भुसाल लाई विजयी गराउन अपिल गरेका छन्।
