चन्दननाथ नगरपालिका– ५जुम्ला बजार स्थीत देवेन्द्र शर्माको घरमा आगलागी भएको छ । शुक्रबार बिहान भएको आगलागीले झण्डै डेढ करोडभन्दा बढीको क्षति भएको छ । शर्मा र उनको छिमेकी लविनध्वज खाँणको घरमा क्षति पुगेको छ । प्रहरीको प्रारम्भिक प्रतिवेदनअनुसार आगलागीबाट घरधनी शर्माको ३८ लाख ८२ हजार र सोही घरमा रहेको राष्टु कठायतको आस्था जनरल स्टोरको गोदाम जल्दा ५० लाखबराबरको क्षति भएको छ । गोदाममा राखिएको खाद्यान्न सामग्री, ल्यापटप, कम्प्युटर, फर्निचर, प्रिन्टरलगायतका सबै सामान जलेर नष्ट भएका छन् । शर्माका छिमेकी खाँणको घरमा समेत आगलागीबाट दुई लाखबराबरको क्षति भएको छ भने सोही घरमा भाडामा रहेको प्रकृति सपिङ सेन्टरको ६ लाखबराबरको सामान जलेर नष्ट भएको छ । यस्तै जनकध्वज खाँणको घरमा ५० हजार, सोही घरमा भाडा रहेको अनुपम कपडा पसलको एक लाख, आसिप खान र रेस्मा जोलाको २६ हजारबराबरको सामग्री जलेर नष्ट भएको छ । चन्दननाथ नगरपालिकाको दमकल, सुरक्षाकर्मी र स्थानीयको सक्रियतामा आगलागी नियन्त्रणमा लिएको डिएसपी लालबहादुर धामीले बताए । सोलार ब्याट्री सर्ट भएर आगलागी भएको हुन सक्ने प्रहरीको अनुमान छ ।
जुम्ला बजारको एक घरमा आलागी , डेढ करोडभन्दा बढीको क्षति
हिमशिखर संवाददाता
२० भाद्र २०७७, शनिबार ०९:४९
