सुर्खेत : वीरेन्द्रनगर नगरपालिका–१२ का वडा सदस्य रामकुमार दर्लामीले सुर्खेत उपत्यका खानेपानी संस्थाका पूर्वकोषाध्यक्ष भीमबहादुर खड्कालाई झुक्याएर संस्थाविरुद्ध सही गराएको आरोप लागेको छ । आफुलाई झुक्याएर दर्लामीले हस्ताक्षर गराएको भन्दै खड्काले आपत्ति जनाएका हुन् ।
वडा सदस्य दर्लामीले घरमा आइ स्किम –२ को खानेपानीसम्बन्धी समस्याको विषयमा छलफल गरी संस्थामा पठाउनु पर्ने भएकोले सही गर्न आग्रह गरेको र त्यसैमा आफूलाई झुक्याएर केही कागजमा आफ्नो सही छाप गराइ फर्किएको खड्काले विज्ञप्तीमार्फत् आरोप लगाएका छन् । उनले विज्ञप्तीमा भनेका छन्, ‘विभिन्न वहानामा खानेपानी जस्तो संस्थालाई बदनाम गराउन खोज्दैछन् । सुर्खेत उपत्यकावासी जनतालाई स्वच्छ, सफा र गुणस्तरीय खानेपानी सेवा उपलब्ध गराउने सेवामुखी संस्थामा यस्तो राजनीति गर्नु राम्रो होइन् ।’
