सुर्खेत , सुर्खेतबाट कालीकोट तर्फ जादै गरेको भे १ च २५६० नम्बरको बोलेरो जिप दुर्घटनामा परी ज्यान गुमाएका चारमध्ये तीन जनाको सनाखत भएको छ । मृतक सबै कालीकोटका रहेका छन् ।
जिल्ला प्रहरी कार्यालय कालीकोटका प्रहरी निरीक्षक एवम् सूचना अधिकारी पोषण थापाका अनुसार बिहीबार बिहान दुई बजे ६ जना यात्रु लिएर कालीकोट आउँदै गरेको बोलेरो जिप दुर्घटना हुँदा कालीकोटको शुभकालीका गाउँपालिका–३ का ३७ वर्षीय वीरेन्द्र बिक, ३१ वर्षीय नवराज बिक र २१ वर्षीया पुष्पा विकको मृत्यु भएको खुलको हो । दुर्घटनामा परी ज्यान गुमाएका अर्का एक जनाको भने सनाखत हुन बाँकी छ ।
सुर्खेतबाट ६ जना यात्रु लिएर जादै गरेको डबलक्याप बोलेरो जिप सुर्खेत–दैलेख सडक खण्डअन्तर्गत वीरेन्द्रनगरस्थित रातानाङ्गला नजिकै दुर्घटना भएको हो । दुर्घटनामा चार जनाको घटनास्थलमै मृत्यु भएको र दुई जना घाइते भएको प्रहीले जनाएको छ ।
घाइते हुनेमा कालीकोटको खाँडाचक्र नगरपालिका ७ का २५ वर्षीय नरेन्द्र बिष्ट र शुभकालिका गाउँपालिका ३ का २८ वर्षीय नरि बिक रहेका छन् । बिष्ट बोलेरो चालक हुन् । घाइते दुई जनाको प्रादेशीक अस्तपाल सुर्खेतमा उपचार भइरहेको छ ।
प्रहरीका अनुसार जिप सडकबाट तीन सय मिटर तल खसेको छ ।
