जुम्ला — झण्डै दुई वर्षदेखि बन्द रहेको राष्ट्रिय मानव अधिकार आयोगको जुम्ला जिल्ला कार्यालय पुनः सञ्चालनमा आएको छ। २०७९ सालदेखि आयोगको कार्यालय सञ्चालन नहुँदा मानव अधिकारसम्बन्धी गुनासा तथा अनुगमन कार्य प्रभावित हुँदै आएको थियो।
आयोगले जुम्ला कार्यालय पुनःसञ्चालन गरी कर्णाली प्रदेशका विभिन्न जिल्लामा मानव अधिकारको अवस्था अनुगमन र प्रवर्द्धनलाई थप प्रभावकारी बनाउने जनाएको छ। नयाँ संयोजकको नेतृत्वमा कार्यालय पुनःसञ्चालन गरिएको हो।
मानव अधिकार संरक्षणका लागि आयोगको स्थानीयरूपमा उपस्थिति आवश्यक रहेको भन्दै नागरिक समाज, सञ्चारकर्मी र अधिकारकर्मीहरूले कार्यालय पुनःखोल्न बारम्बार माग गर्दै आएका थिए। स्थानीयस्तरका मानव अधिकार उल्लंघनका घटनामा पहुँच पुर्याउन र पीडितको न्याय सुनिश्चित गर्न कार्यालय सञ्चालनले टेवा पुर्याउने विश्वास लिइएको छ।
