जुम्लाकाे पातारासी गाउँपालिका–१ मा ट्याक्टरले ठक्कर दिएपछि एक युवकको मृत्यु भएको छ। आज दिउँसो करिब ४:३० बजेतिर ढुङ्गा बोकेर गइरहेको क.०२–००१ ट ०१३८ नम्बरको ट्याक्टरले पातारासी–१ सेलागढी गाउँ नजिकै, माथाचौर क्षेत्रमा १७ वर्षीय नन्दराम बुढालाई ठक्कर दिएको थियो।
मृतक बुढा पातारासी–२ का गोरबहादुर बुढाका छोरा हुन्। ठक्करपछि गम्भीर घाइते भएका उनलाई स्थानीयको सहयोगमा उद्धार गरिएको भए पनि उपचारका क्रममा मृत्यु भएको जिल्ला प्रहरी कार्यालय जुम्लाका प्रहरी निरीक्षक लोकेन्द्र अधिकारीले जानकारी दिए।
दुर्घटनापछि ट्याक्टर चालक धर्मेन्द्र बुढा फरार रहेको र उनको खोजी भइरहेको प्रहरीले जनाएको छ।
