नेपाली कांग्रेसका कर्णाली प्रदेश सभापति ललितजंग शाही माघ ११ गते सम्पन्न राष्ट्रिय सभा सदस्य निर्वाचनमा नेपाली कांग्रेसका तर्फबाट विजयी भएका छन्।
जुम्ला र कर्णालीको राजनीतिमा लामो समयदेखि सक्रिय शाही संविधान सभाका सदस्य तथा संविधान निर्माणकर्ता हुन्। जुम्लाबाट दोस्रो संविधान सभा निर्वाचन जितेका शाही २०७९ सालको प्रदेश सभा निर्वाचनमा भने पराजित भएका थिए।
संविधान सभामा रहँदा उनले जुम्लाको दीर्घकालीन विकासका लागि ऊर्जा क्षेत्रलाई प्राथमिकतामा राख्दै पाँच मेगावाट विद्युत् उत्पादनको योजना बजेटमा समेट्न भूमिका खेलेका थिए। योजना कार्यान्वयनका लागि उनले सर्वोच्च अदालतसम्म कानुनी लडाइँसमेत लडेका थिए।
राष्ट्रिय सभा सदस्य बनेपछि पनि ऊर्जा, पूर्वाधार र कर्णालीका विकासका मुद्दा राष्ट्रिय तहमा उठाउने प्रतिबद्धता उनले व्यक्त गरेका छन्।
