जुम्ला — जुम्लाको चन्दननाथ नगरपालिका–९ मा माटोको ढिस्कोले पुरिँदा एक महिलाको ज्यान गएको छ। मृत्यु हुनेमा स्थानीय ४७ वर्षीया कृष्णमाया तिमिल्सेना रहेकी छन्।
बिहीबार बिहान करिब ११ बजे उठिले नजिक घर लिप्ने माटो खन्ने क्रममा माथिबाट अचानक ठूलो माटोको ढिस्को खस्दा घटना भएको जिल्ला प्रहरी कार्यालय जुम्लाका सूचना अधिकारी शालिकराम खनालले जानकारी दिएका छन्।
उनका अनुसार सो घटनामा दुई महिला पुरिएका थिए। स्थानीय बासिन्दा र नेपाल प्रहरीको सहयोगमा दुवै जनालाई तत्काल उद्धार गरी कर्णाली स्वास्थ्य विज्ञान प्रतिष्ठान पुर्याइएको थियो।
घटनामा गम्भीर घाइते भएकी कृष्णमाया तिमिल्सेनाको उपचारकै क्रममा मृत्यु भएको प्रहरीले जनाएको छ। अर्की घाइते अन्दाजी ४० वर्षीया तारा धर्ती भने उपचारपछि डिस्चार्ज भएर घर फर्किसकेकी छन्।
प्रहरीले घटनाबारे थप अनुसन्धान भइरहेको जनाएको छ।
