जुम्ला : चन्दननाथ नगरापलिका जुम्ला र काठमाडौँ महानगरपालिकाले एक आपसमा भगिनी सम्बन्ध स्थापना गरेका छन् ।
काठमाडौँ महानगरपालिका प्रमुख विद्यासुन्दर शाक्य र चन्दननाथ नगरपालिका प्रमुख कान्तिका सेजुवालले औपचारिक रूपमा समझदारीपत्रमा हस्ताक्षर गरी भगिनी स्थापना गरेका हुन्
समझदारीपत्रमा हस्ताक्षर गर्दै महानगर प्रमुख शाक्यले दुई नगर क्षेत्रभित्रका जीवन्त संस्कृति, सम्पदा र पर्यटकीय, पर्यावरण क्षेत्रको संरक्षण, प्रवर्द्धन, विकास एवं प्रचार प्रसारमा सहकार्य गरिने जानकारी दिए ।‘काठमाडौँमा धेरै मूर्त तथा अमूर्त संस्कृति, सम्पदा छन् । मानव निर्मित सम्पदाले धनी काठमाडौँ सांस्कृतिक सहर र कर्णालीको दुर्गम नगरपालिका चन्दनथानबीच भगिनी सम्बन्ध स्थापना गर्नु आफैँमा सकारात्मक भएका प्रमुख साख्याले बताए ।
महानगरले यसअघि नगर साझेदारी कार्यक्रम अन्तर्गत काठमाडौँका १० वटा नगर, भक्तपुरको मध्यपुर ठिमी र रामग्राम नगरपालिकासँग केही साझेदारीका काम अघि बढाएको छ । भगिनी सम्बन्ध स्थापनाले जुम्लामा उत्पादित बहुमूल्य जडिबुटी, स्याउ, सिमी, ओखरलगायतका प्रांगारिक कृषि उत्पादनको बजारीकरण, व्यवस्थापन आदी विषयमा पनि सहकार्य गर्ने शाक्यले बताए ।
चन्दनथान नगरपालिका प्रमुख कान्तिका सेजुवालले स्रोत साधनले सम्पन्न काठमाडौँ महानगरपालिकासँग भगिनी सम्बन्ध स्थापना गर्न पाएकोमा खुसी व्यक्त गरिन् । भगिनी ले सकारात्मक भुमिका खेल्ने र यहाँका विकास निर्माणमा पनि टेवा पुग्ने उनको भनाइ छ ।
भगिनी सम्वन्ध स्थापना गर्दै कामठमाडौँ महानगरपालिकाले चन्दननाथ नगरपालिकालाई डेढ करोड रकम सहयोग गर्ने गरी समझदारी पत्रमा महानगर प्रमुख शाक्यले हस्ताक्षर गरेका छन् । चन्दननाथ नगरप्रमुख सेजुवालका अनुसार उक्त सहयोग रकमले नगरक्षेत्रमा पर्यटकिय पार्क निर्माण गर्ने योजना छ ।
