कतार विश्वकपबाट बाहिरिएपछि पोर्चुगिच स्टार क्रिस्टियानो रोनाल्डोले पूर्व क्लब रियाल मड्रिडमा अभ्यास थालेका छन् । ३७ वर्षीय रोनाल्डोले आफूलाई फिट राख्न रियाल मड्रिडको अभ्यासस्थल प्रयोग गरेको बताइएको छ । गत महिना इंग्लिस प्रिमियर लिग क्लब म्यान्चेस्टर युनाइटेडले उनको सम्झौता रद्द गरेपछि रोनाल्डो आगामी जनवरी एकदेखि अन्य क्लबमा आबद्ध हुन खुला हुनेछन् । रोनाल्डोले आफ्नो पूर्व क्लब युनाइटेडको व्यवस्थापनप्रति टिप्पणी गर्नुको साथै प्रशिक्षक एरिक टेन हागप्रति आफ्नो कुनै सम्मान नरहेको बताएका थिए । उक्त अन्तरवार्तापछि रुष्ट युनाइटेडले रोनाल्डोसँगको सम्झौता तोडेको थियो । रोनाल्डोलाई साउदी अरबियन क्लब अल नासेरले ठूलो रकमको प्रस्ताव राखेको बताइएको छ । यद्यपि, रोनाल्डोसँग अर्को विकल्प रहेको बुझिएको छ । रोनाल्डोले मड्रिडस्थित भाल्डवेशमा रहेको रियालको मैदानमा अभ्यास गरिरहेका छन् । उनी रियाल नै फर्किने सम्भावना भने अहिलेसम्म देखिएको छैन । रोनाल्डो रियालका सर्वाधिक गोल कर्ता हुन् । सन् २००९ मा युनाइटेडबाट रियाल पुगेका उनले चार सय पचास गोल गरेका थिए । साथै सन् २०१८ सम्मको मड्रिडको बसाईमा उनले चार वटा च्याम्पियन्स लिग र दुईपटक स्पेनिस लिगको उपाधि उचालेका थिए । त्यसपछि उनी सन् २०१८ मा इटालियन क्लब युभेन्टसमा आबद्ध भएका थिए ।
कतार विश्वकपबाट बाहिरिएपछि पूर्व क्लब रियालमा अभ्यास गर्दै रोनाल्डो
महेश चाैलागाँई
१ पुष २०७९, शुक्रबार ०५:४६
