चन्दननाथ बाबाको सेरा ज्युलोमा कालीमार्सी धान रोपिएको छ । परापूर्वकालदेखि नै चन्दननाथ भैरवनाथ गुठी समितिले जेठ १४ गते रोप्दै आएको मन्दिरको खेत यो पटक पनि १४ गते रोपिएको हो । चन्दननाथ भैरवनाथ गुठी समितिका अध्यक्ष अमर थापाका अनुसार हरेक वर्ष जेष्ठ महिनाको १४ गते रोपिएको धान योपटक पनि बिभिन्न कार्यक्रम गरि रोपिएको बताउनुभयो । चन्दननाथ बाबाको सेरा ज्युलो परापूर्वकाल देखि नै मन्दिरमा अक्षता चढाउनका लागि मार्सी धान रोप्ने गर्ने चलन रहेको बताउनुभयो ।
सेरा ज्युलोमा मार्सी रोपाइँका लागि चन्दननाथ नमुना मावि, रत्नचुडेश्वर माविका विद्यार्थी र स्थानीय महिलाले सहयोग गरेका छन् । यस्तै रोपाई कार्यक्रम लाई सम्बोधन गर्दै जिल्ला समन्वय समितिका प्रमुख गौरिनन्द आचार्याका अनुसार जिल्ला विषादीमुक्त भएको जिल्ला भएकाले विषादी निषेध गर्ने र जैविक मल उत्पादनका लागि पहल गर्ने बताउनुभयो । उहाँका अनुसार हामी कर्णालीवासी कृषिमा निर्भर छौँ । हामीले आयातित खाद्यान्नको भर पर्नु नहुने भएकाले बिषाधि पनि प्रयोग नगर्नुपर्ने बताउनुभयो ।
उहाँले बजारमा भित्रिएको खाद्यान्नले रोगी बनाएको भन्दै महिला दिदीबहिनीलाई स्थानीय बाली उत्पादनमा जोड्न आग्रह गर्नुभयो । यस्तै प्रमुख जिल्ला अधिकारी जयकुमार घिमिरेका अनुसार जुम्लामा फल्ने मार्सी धानको पहिचान बचाउन हामी सबैले हातेमालो गर्न आवश्यक रहेको बताउनुभयो ।
सेरा ज्युलो रोप्दै गर्दा मागल गाउने, पञ्चेबाजा बजाउने गरिन्छ । जुम्लाको धार्मिक इतिहाससँग जोडिएको चन्ददनाथको सेरा ज्युलो र पहिचानसँग जोडिएको मार्सी धान रोप्दा मागल गाउने परम्परा रहेको छ । त्यसैगरी चन्दननाथ मावि स्कुलकी शिक्षिका सुमित्रा बुढाका अनुसार सेरा ज्युलो रोप्न सहयोग गर्नका लागि १५० जना छात्रा आएको बताउनुभयो । उहाँले भन्नुभयो, कक्षा नौ र दशमा अध्ययनरत छात्रालाई ल्याइएको हो । प्रत्येक वर्ष गुरु चन्दननाथ बाबाको सेरा ज्युलोमा काली मार्सी धान सबैको सहयोगमा रोपिदै आएको बताउनुभयो ।
