कांग्रेस सभापति शेरबहादुर देउवालाई प्रधानमन्त्रीमा नियुक्तिको १४९ सासंदकाे हस्ताक्षर सहित विपक्षि गठबन्धन सितल निवास पुगेकाे छ ।
सिंहदरबारस्थित कांग्रेसको संसदीय दलको कार्यालयमा बसेको कांग्रेस, माओवादी केन्द्र, जसपाको उपेन्द्र यादव समूह र नेकपा एमालेको माधव नेपाल समूहको संयुक्त बैठकले देउवाको नेतृत्वमा नयाँ सरकार बनाउने सहमति गरेका हुन् । बैठकलगत्तै नेताहरू शीतलनिवास प्रस्थान गरेका छन् ।
राष्ट्रपति विद्यादेवी भण्डारीले शुक्रबार साँझ ५ बजेसम्मको समय दिएर संविधानको धारा ७६ (५)बमोजिमको सरकार गठनको आह्वान गरेकी थिइन् । त्यो समयअगावै दलहरूले बहुमतको सरकारको दाबी गर्न लागेका हुन् ।
देउवालाई प्रधानमन्त्री बनाउन प्रतिनिधिसभाका एक सय ४९ जना सांसदले हस्ताक्षर गरेका छन् । जसमा कांग्रेसका ६१, माओवादी केन्द्रका ४९, जसपाका १२ र माधव नेपाल समूहका २७ जना सांसदले हस्ताक्षर गरेका छन् ।
