राष्ट्रिय प्रजातन्त्र पार्टीले उपप्रधानमन्त्री सहित मन्त्रालय पाएपछि सरकारमा सहभागी हुने भएको छ।
सोमबार राति अबेर सकिएको सत्ता गठबन्धनको बैठकले राप्रपालाई तीन मन्त्रालय दिने सहमति जुटाएको राप्रपाका एक नेताले हिमशिखर अनलाइनलाई जानकारी दिए।
उनका अनुसार राप्रपा अध्यक्ष राजेन्द्र लिङ्देन उपप्रधानसहित ऊर्जा जलस्रोत तथा सिंचाइ मन्त्रालयको जिम्मेवारीमा सहभागी हुने तय भएको छ।
बाँकी दुई मन्त्रालयमा कसलाई पठाउने भन्ने निर्णय नभए पनि सहरी विकासमा धवल शमशेर राणा र युवा तथा खेलकुद मन्त्रीमा ज्ञानेन्द्र शाहीकाे नाम चर्चामा आइरहेकाे छ।
राप्रपाका भागमा ऊर्जा, जलस्रोत तथा सिंचाई, सहरी विकास र युवा तथा खेलकुद मन्त्रालय परेको छ। राप्रपाले यसअघि ऊर्जाका अलवा संस्कृति, पर्यटन तथा नागरिक उड्डयन र भूमि व्यवस्था, सहकारी तथा गरिबी निवारण मन्त्रालयमा दाबी गरेको थियाे।
राप्रपा सरकारमा सहभागी भएसँगै सरकारका उपप्रधानमन्त्रीको संख्या ४ पुगेकाे छ। यसअघि सरकारमा एमाले, माओवादी र रास्वपाबाट एक/एक जना उपप्रधानमन्त्री छन्।
